Main khayal hun kisi aur ka |Shayari | Urdu Poetry

Main khayal hun kisi aur ka mujhe sochta koi aur hai

Sar e aina mira aks hai pas e aina koa aur hai

Main kisi ke dast e talab main hun to kisi ke harf e dua main hun

Main nasib hun kisi aur ka mujhe mangta koi aur hai

Ajab etibar o beetibari ke darmiyan hai zindagi

Main qarib hun kisi aur ke mujhe janta koi aur hai

Meri raushni tere khadd o ḳhal se muḳhtalif to nahin magar

Tu qarib aa tujhe dekh lun tu vahi hai ya koi aur hai

Tujhe dushmanon ki khabar na thi mujhe doston ka pata nahin

Teri dastan koi aur thi mera vaqiaa koi aur hai

Vahi munsifon ki rivayaten vahi faislon ki ibaraten

Mera jurm to koi aur tha pa meri saza koi aur hai

Kabhi laut aaen to puchhna nahin dekhna unhen ghaur se

Jinhen raste main khabar hui ki ye rasta koi aur hai

Jo meri riyazat e neem shab ko 'Salim' subh na mil saki

To phir is ke maani to ye hue ki yahan khuda koi aur hai